《我的初老症狀》（下）
上次寫咗十個我覺得自己初老嘅瞬間
（傳送門：https://bit.ly/37e3Jmb）
大家都好似有啲共鳴，所以我決定寫埋下集！
11）開始覺得商場/餐廳冷氣太凍！
由細到大我都係大汗又怕熱嗰種人，所以一去到有冷氣地方都覺得好舒服！麥仔比較怕凍，所以一開始一齊嗰陣我會坐風口位，冷氣吹住自己覺得好撚爽！但近年姐姐不行了！有幾次吹正風口真係頂唔住，快手食完就要走！
12）飲唔到有冰嘅飲品
以前嗌走冰係貪心想飲多啲/唔想溝淡，依家一定一定要嗌走冰，因為飲唔到！太凍會氣管又唔舒服，個頭又痛，個身又發冷咁！雖然我未至於要飲熱飲，但真係再飲唔到沙冰類飲品啦！
13）會同人哋個仔講「我由細睇到你大」
有次見到朋友五歲個女，我有好想同佢講「你知唔知你BB仔我就識你啦」。但我都吞番落肚唔敢講！因為我諗起細個好多阿姨阿叔都會咁同我講，見一次就講一次，每次我都諗「得啦」「咁點呀」。所以依家都盡力忍住，唔好捉住人哋啲仔女講。
14）太陽底下要擔遮。
以前同我媽出街佢會擔住把遮，佢成日都叫我一齊遮，我都會拒絕。以前真係唔怕曬，又或者係唔知道太陽嘅狠毒！依家出街一定搽防曬，個袋一定有把防UV遮。老娘怕的唔係曬，而係曬完臉上會浮出嚟嘅斑。
15）愈嚟愈固執。
森美之前話人變老有兩個走向：一個係愈嚟愈無所謂；一個係愈老愈固執。我覺得自己係傾向後者。好怕自己會變成一個唔聽人講嘢嘅老野。所以成日都要提醒自己要選擇性固執，而非凡事固執。
16）學新野慢咗好多⋯好多。
依家要重新適應一樣新嘅事物都要花更多時間，例如啱啱淨係喺MeWe開acc，開page都覺得吃力。諗起以前由ICQ轉去MSN，hkflash轉去xanga⋯點會覺得吃力㗎？仲好快學埋xanga啲html code㖭呀！
17）開始唔想認識新朋友。
細個從來都唔會嫌朋友太多，到依家開始覺得朋友唔需要太多。因為覺得時間有限，無能力去經營太多關係。不如專注地維持好依家嘅友情，鞏固好現有嘅關係。
18）成日都唔記得自己幾歲。
人過25以後，對於年齡概念開始模糊。有時突然被問到今年幾歲，都會答錯上年嘅歲數。我有時都會衝口而出覺得自己27歲。要諗番自己幾多歲，就要用2020去減番出生年份先計到。
19）學識拒絕。
以前細個總係唔識得say no！面對街邊做訪問叫捐錢嘅人也好，或者係美容院/化妝專櫃嘅sales都好，總係無辦法開口拒絕，直頭覺得難以啟齒。但依家開始識得點樣婉拒別人，開始識得保護番自己，守護番自己嘅權益。
20）終於夠膽投訴/指責陌生人。
承上題，以前畀人打尖我都唔會出聲，依家我會夠膽出聲，亦都好想出聲。遇到唔合理嘅事我都會拎出我嘅投訴之刀！唔再做街頭鵪鶉，阿婆你排番隊呀！
//
【#招Fd子】
港女友已經登陸咗MeWe：https://bit.ly/33n25xx
喺MeWe度Search「港女友」會搵得到啦！
暫時兩邊都會出文，亦會放番啲舊文落MeWe！
有MeWe朋友Follow番，支持下先。
IG：@hkgirlfriend
FB：港女友
Search